Enormement feliç

Diuendres Aleksandra, polaca qu'estudie en UK, vegetariana e divertida, me didec que me volie coma bessoa tara Twin Party d’aquera net. Mo n’anèrem alavetz entara Rue Sainte Catherine ara recerca de bèra causa interessant, e acabèrem damb ua samarreta ròsa a on se liegie: Boys will be toys. It’s funny!, non paraue de repetir-me. Jo escuelhí era diadèma, deth madeish ròsa estrident, que me rebrembaue a quan encara non lheuaua dus pams de tèrra e coleccionaua diadèmes en cap deth lhet. Fin finau, siguerem tres bessoes e non dues, e era nòsta samarreta causèc mès d’un comentari. 

Dissabte auerem cita nacionau damb era religion de Canada: eth hockey. Dehòra deth Centre Bell mafiosi damb alent a alcohòl venien descaradament tickets ilegals entath partit. Dilhèu ei que mos manquèc talent negociador, eth cas ei qu’eth nòste intent de trapar entrades tara arena de mens de 100$, quedèc en aquerò, en un intent. Deciderem alavetz cambiar es grades per ua taula en  sportsbar, a on es americans qu’èren damb jo minjauen nachos + ketchup + hormatge + mayonesa, entot que cridauen  e beuien litres de cervesa. Es Montréal Candiens perderen contra New Jersey.

Aguesti dies Montréal comence a delir-se, eth cèu dèishe entreveir es prumèrs arrais de primauera, era gent gòse caminar sense guants e daurir era hièstra dera mia cramba peth maitin ei ua ventada d’aire fresc, que ja non me congèle. Aué ère un bon dia entà dar un torn peth carrèr, atau que dempús d’amassar-me damb Pierre e Radia ena universitat entà acabar de premanir eth nòste Project d’Importation, è anat a dar un torn, damb era soleta companhia der iPod en que, de forma ja sistematica, s’escoten cançons de ABBA.  En arribar en casa è rebut ua notícia que m’a hèt enormement feliç. Lèu, ben lèu…